یہ کیسے کہہ دوں کہ کچھ تم سے واسطہ ہی نہیں

یہ کیسے کہہ دوں کہ کچھ تم سے واسطہ ہی نہیں

بچھڑ کے تم سے کہیں اور دل لگا ہی نہیں

نظر ملا کے کیا بے نیاز ہوش مجھے

تمہاری نظروں میں جیسے کہ کچھ ہوا ہی نہیں

مجھے ستائیں گی کیا گردشیں زمانے کی

میں کل کے بارے میں اے دوست سوچتا ہی نہیں

یہ اہل بزم مجھے دیکھتے ہیں حیرت سے

میں جس کو دیکھ رہا ہوں وہ دیکھتا ہی نہیں

سکون قلب و جگر لوٹ لے گیا دانشؔ

ایک ایسا شخص کہ جس کو میں جانتا ہی نہیں

ye kaise kah dun ke kuchh tum se wasta hi nahin

bichhar ke tum se kahin aur dil laga hi nahin

nazar mila ke kiya be niyaz hosh mujhe

tumhari nazron mein jaise ke kuchh hua hi nahin

mujhe sataengi kya gardishen zamane ki

main kal ke bare mein ai dost sochta hi nahin

ye ahl-e-bazm mujhe dekhte hain hairat se

main jis ko dekh raha hun wo dekhta hi nahin

sukun-e-qalb-o-jigar laut le gaya danish

ek aisa shakhs ke jis ko main janta hi nahin