واعظ تو اگر ان کے کوچے سے گزر جائے

واعظ تو اگر ان کے کوچے سے گزر جائے

فردوس کا منظر بھی نظروں سے اتر جائے

روداد شب غم یوں ڈرتا ہوں سنانے سے

محفل میں کہیں ان کی صورت نہ اتر جائے

اک وعدۂ فردا کی امید پہ زندہ ہوں

اے کاش کسی صورت یہ رات گزر جائے

کعبے ہی کے رستے میں مے خانہ بھی پڑتا ہے

الجھن میں یہ رہرو ہے جائے تو کدھر جائے

تم ان سے ملو دانشؔ یہ دھیان رہے لیکن

خودداری فطرت کا احساس نہ مر جائے

waiz to agar un ke kuche se guzar jae

firdaus ka manzar bhi nazron se utar jae

rudad-e-shab-e-gham yun darta hun sunane se

mahfil mein kahin un ki surat na utar jae

ik waada-e-farda ki ummid pe zinda hun

ai kash kisi surat ye rat guzar jae

kaabe hi ke raste mein mai khana bhi parta hai

uljhan mein ye rahrau hai jae to kidhar jae

tum un se milo danish ye dhyan rahe lekin

khuddari-e-fitrat ka ehsas na mar jae