اب ان کا غم بھی ہمیں دل کشا سا لگتا ہے

اب ان کا غم بھی ہمیں دل کشا سا لگتا ہے

یہ اجنبی تو ہمیں آشنا سا لگتا ہے

فریب خوردۂ رسم وفا سا لگتا ہے

یہ زخم دل کہ جو ہنستا ہوا سا لگتا ہے

خود اپنے دل سے تراشا ہے جو صنم میں نے

خدا نہیں ہے وہ لیکن خدا سا لگتا ہے

ملا ہے جس کو مری بندگی کا حسن خلوص

وہ نقش سجدہ ترے نقش پا سا لگتا ہے

کبھی کبھی تری یادوں کی انجمن میں یہ دل

خود اپنے آپ سے روٹھا ہوا سا لگتا ہے

رخ حیات یہ ہلکا سا اک تبسم بھی

غم حیات کا مارا ہوا سا لگتا ہے

بدل گئی ہے یہ کس کی نظر خدا جانے

رخ حیات بدلتا ہوا سا لگتا ہے

یہ داغ دل ہیں کہ اے بدرؔ حسرتوں کے صنم

خدا کا گھر ہے مگر بت کدہ سا لگتا ہے