یوں بچھڑ جاؤں گا تم سے میں نے یہ سوچا نہ تھا

یوں بچھڑ جاؤں گا تم سے میں نے یہ سوچا نہ تھا

قربتوں میں فاصلوں کا کوئی اندازہ نہ تھا

جانے پہچانے ہوئے چہرے بھی سب تھے اجنبی

کتنا تنہا تھا وہاں بھی میں جہاں تنہا نہ تھا

اپنے دل کا زہر غم آنکھوں سے جو چھلکا گیا

وہ سمندر تھا مگر میری طرح گہرا نہ تھا

زندگی ہم بھی تری قدروں کے وارث تھے مگر

اپنی قسمت میں فقط دیوار تھی سایہ نہ تھا

ہر طرف ہے اب مری خاموشیوں کی بازگشت

زندگی میں اس سے پہلے اتنا سناٹا نہ تھا

روٹھنے والے مری چاہت کا اندازہ تو کر

اس قدر تو میں نے خود کو بھی کبھی چاہا نہ تھا

زخم بھی جس نے دئے ہیں مجھ کو غیروں کی طرح

وہ مرا اپنا تھا لیکن مجھ کو پہچانا نہ تھا

پیار آخر کیوں نہ آتا اپنے قاتل پر مجھے

میرے اس کے درمیاں کیا خون کا رشتہ نہ تھا

ہے وفائی کی شکایت تھی مجھے اس سے مگر

اس کی مجبوری کو جب تک بدرؔ میں سمجھا نہ تھا

yun bichhar jaunga tum se main ne ye socha na tha

qurbaton mein faslon ka koi andaza na tha

jane pahchane hue chehre bhi sab the ajnabi

kitna tanha tha wahan bhi main jahan tanha na tha

apne dil ka zahr-e-gham ankhon se jo chhalka gaya

wo samundar tha magar meri tarah gahra na tha

zindagi ham bhi tiri qadron ke waris the magar

apni qismat mein faqat diwar thi saya na tha

har taraf hai ab miri khamoshiyon ki bazgasht

zindagi mein is se pahle itna sannata na tha

ruthne wale miri chahat ka andaza to kar

is qadar to main ne khud ko bhi kabhi chaha na tha

zakhm bhi jis ne diye hain mujh ko ghairon ki tarah

wo mira apna tha lekin mujh ko pahchana na tha

pyar akhir kyun na ata apne qatil par mujhe

mere us ke darmiyan kya khun ka rishta na tha

hai wafai ki shikayat thi mujhe us se magar

us ki majburi ko jab tak badr mein samjha na tha