پھر اس نگاہ کا نشتر مری تلاش میں ہے

پھر اس نگاہ کا نشتر مری تلاش میں ہے

سکون دل کا پیمبر مری تلاش میں ہے

وہ جس نے مجھ کو کبھی آئنے میں دیکھا تھا

وہ ایک شخص برابر مری تلاش میں ہے

میں اپنی ذات میں بھٹکا ہوا مسافر ہوں

ہر ایک راہ کا پتھر مری تلاش میں ہے

یہ زندگی کا اندھیرا یہ کرب تنہائی

صلیب و دار کا منظر مری تلاش میں ہے

بہ نام تلخیٔ دوراں بہ نام زہر حیات

سنا ہے پھر کوئی ساغر مری تلاش میں ہے

سکوت ناز کو انداز گفتگو دے کر

کسی کی چشم سخنور مری تلاش میں ہے

ملا نہ چشمۂ حیواں سے جس کو آب حیات

نصیب کا وہ سکندر مری تلاش میں ہے

مجھے پناہ دے اے میرے غم کی تنہائی

امید و بیم کا لشکر مری تلاش میں ہے

میں بدرؔ اپنے اجالے میں خود ہی ڈوب گیا

تجلیٔ مہ و اختر مری تلاش میں ہے

phir us nigah ka nashtar miri talash mein hai

sukun-e-dil ka payambar miri talash mein hai

wo jis ne mujh ko kabhi aine mein dekha tha

wo ek shakhs barabar miri talash mein hai

main apni zat mein bhatka hua musafir hun

har ek rah ka patthar miri talash mein hai

ye zindagi ka andhera ye karb-e-tanhai

salib-o-dar ka manzar miri talash mein hai

ba nam talkhi-e-dauran ba nam zahr-e-hayat

suna hai phir koi saghar miri talash mein hai

sukut-e-naz ko andaz-e-guftugu de kar

kisi ki chashm sukhanwar miri talash mein hai

mila na chashma-e-haiwan se jis ko ab-e-hayat

nasib ka wo sikandar miri talash mein hai

mujhe panah de ai mere gham ki tanhai

ummid-o-bim ka lashkar miri talash mein hai

main badr apne ujale mein khud hi dub gaya

tajalli-e-mah-o-akhtar miri talash mein hai