کتنا عجیب شہر تمنا دکھائی دے

کتنا عجیب شہر تمنا دکھائی دے

ہے اتنی روشنی کہ اندھیرا دکھائی دے

تعبیر کس سے پوچھئے اس خواب شوق کی

جو خواب دیکھیے تو ادھورا دکھائی دے

اب عام ہو چلی ہے یہی رسم زندگی

ہر شخص اپنے درد کا مارا دکھائی دے

ابھرے مرے دریچۂ دل سے وہ چاند جب

سورج بھی سامنے ہو تو ڈھلتا دکھائی دے

اس شہر آرزو میں عجب خوش نظر ہیں لوگ

بخشے جو دل کو درد مسیحا دکھائی دے

جس انجمن میں سب کی نظر ہو تری طرف

اس انجمن میں کون کسی کا دکھائی دے

کتنی عجیب چوٹ ہے یہ دل کی چوٹ بھی

بھرنے لگے جو زخم وہ گہرا دکھائی دے

تجھ سے الگ نہیں ہے کوئی رنگ دل کشی

ہر رنگ تیرے رنگ میں ڈھلتا دکھائی دے

دل میں نہ ہو جو داغ تمنا کی روشنی

اے بدرؔ زندگی میں اندھیرا دکھائی دے

kitna ajib shahr-e-tamanna dikhai de

hai itni raushni ke andhera dikhai de

taabir kis se puchhiye is khwab shauq ki

jo khwab dekhiye to adhura dikhai de

ab am ho chali hai yahi rasm-e-zindagi

har shakhs apne dard ka mara dikhai de

ubhre mire daricha-e-dil se wo chand jab

suraj bhi samne ho to dhalta dikhai de

is shahr-e-arzu mein ajab khush nazar hain log

bakhshe jo dil ko dard masiha dikhai de

jis anjuman mein sab ki nazar ho tiri taraf

is anjuman mein kaun kisi ka dikhai de

kitni ajib chot hai ye dil ki chot bhi

bharne lage jo zakhm wo gahra dikhai de

tujh se alag nahin hai koi rang dil kashi

har rang tere rang mein dhalta dikhai de

dil mein na ho jo dagh-e-tamanna ki raushni

ai badr zindagi mein andhera dikhai de