تم اپنے ساتھ مری چشم تر بھی لے جاؤ

تم اپنے ساتھ مری چشم تر بھی لے جاؤ

سفر طویل ہے اک ہم سفر بھی لے جاؤ

نظر میں رونق دیوار و در بھی لے جاؤ

یہ کیا کہ دشت نوردی میں گھر بھی لے جاؤ

ان آندھیوں میں بھروسہ ہی کیا چراغوں کا

سجا کے اپنی ہتھیلی پہ سر بھی لے جاؤ

تم اپنی رات سجاؤ نئے اجالوں سے

ہمارا کیا ہے ہمارا سحر بھی لے جاؤ

ملیں گے زخم بہت زندگی کے میلے میں

تم اپنے ساتھ ہمارا جگر بھی لے جاؤ

میں ایک راہ کا پتھر سہی مگر لوگو

کبھی مجھے کسی آذر کے گھر بھی لے جاؤ

تمہارے ہاتھ کی خوشبو ضرور مہکے گی

ہماری خاک سے کوئی شرر بھی لے جاؤ

میں زندگی کے اندھیروں کا درد سہہ لوں گا

تم اپنی یاد کے شمس و قمر بھی لے جاؤ

میں بدرؔ خود ہی مسیحا ہوں اپنے زخموں کا

یہ جرم ہے تو مجھے دار پر بھی لے جاؤ

tum apne sath miri chashm-e-tar bhi le jao

safar tawil hai ik ham safar bhi le jao

nazar mein raunaq-e-diwar-o-dar bhi le jao

ye kya ke dasht nawardi mein ghar bhi le jao

in andhiyon mein bharosa hi kya charaghon ka

saja ke apni hatheli pe sar bhi le jao

tum apni rat sajao nae ujalon se

hamara kya hai hamara sahar bhi le jao

milenge zakhm bahut zindagi ke mele mein

tum apne sath hamara jigar bhi le jao

main ek rah ka patthar sahi magar logo

kabhi mujhe kisi azar ke ghar bhi le jao

tumhare hath ki khushbu zarur mahkegi

hamari khak se koi sharar bhi le jao

main zindagi ke andheron ka dard sah lunga

tum apni yad ke shams-o-qamar bhi le jao

main badr khud hi masiha hun apne zakhmon ka

ye jurm hai to mujhe dar par bhi le jao