شمع جلے ہے محفل محفل خاک بسر پروانہ ہے — Badr Shamsi

Arooz is now on the App Store, for iPhone and iPad. Download →

شمع جلے ہے محفل محفل خاک بسر پروانہ ہے

اس دنیا میں درد پرایا سچ ہے کس نے جانا ہے

بات فقط اتنی ہے واعظ دور کا ڈھول سہانا ہے

ورنہ جنت اپنی جگہ ہے مے خانہ مے خانہ ہے

ان کے جلوے میری نگاہیں دونوں ہیں کچھ فرق نہیں

مان لیا عنوان الگ ہیں لیکن ایک فسانہ ہے

ترک راہ و رسم وفا کا ہے ان پر الزام غلط

آج بھی اپنی خلوت دل میں ان کا آنا جانا ہے

آتے آتے آ جائے گا چین بھی غم کے ماروں کو

بھرتے بھرتے بھر جائے گا دل کا زخم پرانا ہے

بدرؔ ہمارے شیشۂ دل میں ہیں اس کی تصویر سبھی

جس کو سب کعبہ کہتے ہیں وہ بھی اک بت خانہ ہے