پیمان وفا توڑ کے جانے کے لئے آ

پیمان وفا توڑ کے جانے کے لئے آ

آ دل کی لگی اور بڑھانے کے لئے آ

پامال ہی کر ظلم ہی ڈھانے کے لئے آ

مجھ کو مرا احساس دلانے کے لئے آ

نوخیز بہاروں سے مرے دل کو سجا دے

زخموں کے نئے پھول کھلانے کے لئے آ

کب سے غم حالات کی راہوں میں پڑا ہوں

تو بھی کوئی ٹھوکر ہی لگانے کے لئے آ

پھولوں کا تقاضا تو نہیں دست کرم سے

کانٹے مری راہوں میں بچھانے کے لئے آ

ہو طنز کی بارش بھی توجہ کی ادا سے

اے ابر کرم آگ لگانے کے لئے آ

اب خود کو بھلاؤں کہ تجھے یاد کروں میں

اے حاصل غم اتنا بتانے کے لئے آ

لکھا ہے مرا نام ترے دل کے ورق پر

میں حرف غلط ہوں تو مٹانے کے لئے آ

ہر زخم دل بدرؔ کو اک تازہ خلش دے

لو بجھتے چراغوں کی بڑھانے کے لئے آ

paiman-e-wafa tor ke jane ke liye a

a dil ki lagi aur barhane ke liye a

pamal hi kar zulm hi dhane ke liye a

mujh ko mira ehsas dilane ke liye a

naukhez baharon se mire dil ko saja de

zakhmon ke nae phul khilane ke liye a

kab se gham halat ki rahon mein para hun

tu bhi koi thokar hi lagane ke liye a

phulon ka taqaza to nahin dast-e-karam se

kante miri rahon mein bichhane ke liye a

ho tanz ki barish bhi tawajjoh ki ada se

ai abr-e-karam ag lagane ke liye a

ab khud ko bhulaun ke tujhe yad karun main

ai hasil gham itna batane ke liye a

likha hai mira nam tire dil ke waraq par

main harf-e-ghalat hun to mitane ke liye a

har zakhm-e-dil badr ko ik taza khalish de

lo bujhte charaghon ki barhane ke liye a