نادیدہ منزلوں کے پیمبر بہت ملے

نادیدہ منزلوں کے پیمبر بہت ملے

ہم کو ہماری راہ کے پتھر بہت ملے

درد آشنا خلوص کے پیکر بہت ملے

زخموں کو ڈھونڈتے ہوئے نشتر بہت ملے

سینے سے ہم لگائے ہوئے تھے متاع درد

ہم سے ملے بھی لوگ تو بچ کر بہت ملے

کس کس کو اپنے دل میں ہم آخر اتارتے

جو ہم پہ مہرباں تھے وہ خنجر بہت ملے

یادوں کے زخم دل کا لہو درد بے کسی

کوچے میں زندگی کے ستمگر بہت ملے

دیکھا جدھر لگی تھی شکستہ دلوں کی بھیڑ

آبادیوں میں اجڑے ہوئے گھر بہت ملے

پلکوں پہ اپنی خوب اگی آنسوؤں کی فصل

ان خشک ڈالیوں پہ گل تر بہت ملے

بھیجے ہیں اس نے کتنے محبت بھرے خطوط

ہم کو ہمارے قتل کے محضر بہت ملے

اے بدرؔ دل کے داغ تھے راتوں کو ضو فشاں

تیرہ شبی میں چاند سے پیکر بہت ملے

nadida manzilon ke payambar bahut mile

ham ko hamari rah ke patthar bahut mile

dard-e-ashna khulus ke paikar bahut mile

zakhmon ko dhundte hue nashtar bahut mile

sine se ham lagae hue the mata-e-dard

ham se mile bhi log to bach kar bahut mile

kis kis ko apne dil mein ham akhir utarte

jo ham pe mehrban the wo khanjar bahut mile

yadon ke zakhm-e-dil ka lahu dard-e-be kisi

kuche mein zindagi ke sitamgar bahut mile

dekha jidhar lagi thi shikasta dilon ki bhir

abadiyon mein ujre hue ghar bahut mile

palkon pe apni khub ugi ansuon ki fasl

un khushk daliyon pe gul-e-tar bahut mile

bheje hain us ne kitne mohabbat bhare khutut

ham ko hamare qatl ke mahzar bahut mile

ai badr dil ke dagh the raton ko zau fishan

tira shabi mein chand se paikar bahut mile