جو چاند کو آغوش میں لینے پہ اڑا تھا

جو چاند کو آغوش میں لینے پہ اڑا تھا

ہر چند وہ بچہ تھا مگر دل کا بڑا تھا

جب اپنی ہی پہچان سے رن اپنا پڑا تھا

ہم ایسے جیالوں پہ بھی وہ وقت کڑا تھا

طوفان سے لڑنے کی علامت تھا جو سوچو

یوں کہنے کو مٹی کا وہ اک کچا گھڑا تھا

کھل کر مجھے اک سانس کا لینا بھی تھا مشکل

حالات کا نیزہ مرے سینے میں گڑا تھا

وہ تیر چلاتا رہا نزدیک سمجھ کر

لیکن میں نشانے سے بہت دور کھڑا تھا

دیکھا تو ہمیں ٹوٹ کے دو ٹکڑے ہوئے تھے

دشمن کی صفوں میں بھی ہمارا ہی دھڑا تھا

ہر دھوپ میں جلنا ہی رہا اس کا مقدر

دیوار کا سایہ پس دیوار پڑا تھا

ہنگامۂ جاں شور انا دل کی قیامت

میں کتنے محاذوں پہ اکیلا ہی لڑا تھا

ہر زخم جو بخشا تھا مجھے اس کی نظر نے

اے بدرؔ نگینے کی طرح دل میں جڑا تھا

jo chand ko aghosh mein lene pe ura tha

har chand wo bachcha tha magar dil ka bara tha

jab apni hi pahchan se ran apna para tha

ham aise jiyalon pe bhi wo waqt kara tha

tufan se larne ki alamat tha jo socho

yun kahne ko mitti ka wo ik kachcha ghara tha

khul kar mujhe ik sans ka lena bhi tha mushkil

halat ka neza mire sine mein gira tha

wo tir chillata raha nazdik samajh kar

lekin main nishane se bahut dur khara tha

dekha to hamen tut ke do tukre hue the

dushman ki safon mein bhi hamara hi dhara tha

har dhup mein jalna hi raha us ka muqaddar

diwar ka saya pas-e-diwar para tha

hangama-e-jan shor-e-ana dil ki qayamat

main kitne mahazon pe akela hi lara tha

har zakhm jo bakhsha tha mujhe us ki nazar ne

ai badr nagine ki tarah dil mein jura tha