میرے غم کی منزل میں جیسے وہ بھی ٹھہرے ہیں

میرے غم کی منزل میں جیسے وہ بھی ٹھہرے ہیں

خواب جو نہیں دیکھے کس قدر سنہرے ہیں

مدتیں ہوئیں ان کو ایک بار دیکھا تھا

آج تک نگاہوں پر آنسوؤں کے پہرے ہیں

کب کسی کی سنتے ہیں ان کو دیکھنے والے

جن کی آنکھ روشن ہے ان کے کان بہرے ہیں

کم نہیں تغافل سے التفات بھی ان کا

داغ وہ بھی تازہ ہیں زخم یہ بھی گہرے ہیں

کیا خبر زمانے کو ہم سے کتنے دیوانے

زندگی کے دامن پر اشک بن کے ٹھہرے ہیں

دل میں کیا ہے باتوں سے کچھ پتہ نہیں چلتا

آج کل زمانے میں دوست کتنے گہرے ہیں

یادگار ماضی ہیں بدرؔ اپنے داغ دل

قافلے بہاروں کے اس جگہ بھی ٹھہرے ہیں

mere gham ki manzil mein jaise wo bhi thahre hain

khwab jo nahin dekhe kis qadar sunahre hain

muddaten huin un ko ek bar dekha tha

aj tak nigahon par ansuon ke pahre hain

kab kisi ki sunte hain un ko dekhne wale

jin ki ankh raushan hai un ke kan bahre hain

kam nahin taghaful se iltifat bhi un ka

dagh wo bhi taza hain zakhm ye bhi gahre hain

kya khabar zamane ko ham se kitne diwane

zindagi ke daman par ashk ban ke thahre hain

dil mein kya hai baton se kuchh pata nahin chalta

aj kal zamane mein dost kitne gahre hain

yadgar-e-mazi hain badr apne dagh-e-dil

qafile baharon ke is jagah bhi thahre hain