بیتے لمحوں کی خوشبوئیں زخموں کی سوغات ملی

بیتے لمحوں کی خوشبوئیں زخموں کی سوغات ملی

تنہائی کے سونے پن میں یادوں کی بارات ملی

اتنے پتھر برسائے ہیں پھول سے نازک ہونٹوں نے

زخموں کے اک ڈھیر کے نیچے کچلی اپنی ذات ملی

ٹوٹے ہیں ہر ایک قدم پر بکھرے ہیں ہر موڑ پہ ہم

سنگ دلوں کے شہر میں ہم کو شیشے کی اوقات ملی

دل کے لہو نے آنسو بن کر غم کو سہانا پن بخشا

جلتے صحرا میں بھی ہم کو رنگوں کی برسات ملی

ہنس ہنس کے ہر زور و ستم کو ہم نے دل پر روک لیا

اس شیشے سے جو ٹکرایا اس پتھر کو مات ملی

یادوں کا بن باس لکھا تھا اپنے رام کی قسمت میں

ہم کو بھری آبادی میں بھی تنہا اپنی ذات ملی

اپنے دل کو اور جلا کر ہم نے اجالا پھیلایا

جس منزل پر جس رستے میں بدرؔ جہاں تک رات ملی

bite lamhon ki khushbuen zakhmon ki saughat mili

tanhai ke sone pan mein yadon ki barat mili

itne patthar barsae hain phul se nazuk honton ne

zakhmon ke ik dher ke niche kuchli apni zat mili

tute hain har ek qadam par bikhre hain har mor pe ham

sang dilon ke shahr mein ham ko shishe ki auqat mili

dil ke lahu ne ansu ban kar gham ko suhana pan bakhsha

jalte sahra mein bhi ham ko rangon ki barsat mili

hans hans ke har zor-o-sitam ko ham ne dil par rok liya

is shishe se jo takraya is patthar ko mat mili

yadon ka ban bas likha tha apne ram ki qismat mein

ham ko bhari abadi mein bhi tanha apni zat mili

apne dil ko aur jala kar ham ne ujala phailaya

jis manzil par jis raste mein badr jahan tak rat mili