وہ چاندنی وہ چاند سا پیکر اتار دے

وہ چاندنی وہ چاند سا پیکر اتار دے

پہلو میں کوئی خواب کا منظر اتار دے

محفوظ اب نہیں ہیں مرے دل کی سرحدیں

کہہ دو کسی غنیم سے لشکر اتار دے

کب سے شریک ہوں میں جہاد حیات میں

بہر نجات کوئی مرا سر اتار دے

ٹوٹے ترا خیال تو بستر کی ہر شکن

آنکھوں میں جیسے نیند کے نشتر اتار دے

دل سے لگائے کون مرا غم مری خوشی

ہر شخص دل کا بوجھ سمجھ کر اتار دے

جنبش جب اس کے لب کو ہوئی تو پتہ چلا

چٹکے کلی تو روح میں نشتر اتار دے

کب سے اٹھائے پھرتا ہوں تنہائیوں کا بوجھ

دل سے کوئی یہ درد کا پتھر اتار دے

اے بدرؔ اشک غم کے علاوہ کوئی تو ہو

تیرہ شبی میں جو مہ و اختر اتار دے