گزری ہوئی بہار کا کوئی پتا نہیں

گزری ہوئی بہار کا کوئی پتا نہیں

اس پیڑ میں تو ایک بھی پتا ہرا نہیں

میں خود بھی اپنے گوش سماعت پہ بار ہوں

وہ حرف ہوں جسے ترا لہجہ ملا نہیں

اس بھیڑ میں ہیں سب وہی دیرینہ اجنبی

میرے لئے تو ایک بھی چہرہ نیا نہیں

ناراض مجھ سے شہر کے بچے ہیں اس لئے

میں ان کے ہاتھ بن کے کھلونا رہا نہیں

پھینکا ہے کس کے ہاتھ نے پتھر میں دیکھ لو

پتھر سے بڑھ کے اور کوئی آئنہ نہیں

کس حوصلہ سے خود کو سمیٹے ہوئے ہوں میں

ٹوٹا ہوا ضرور ہوں بکھرا ہوا نہیں

اس سے بچھڑ کے ملتی کوئی روشنی تو کیا

اے بدرؔ مجھ کو خود مرا سایہ ملا نہیں

guzri hui bahar ka koi pata nahin

is per mein to ek bhi patta hara nahin

main khud bhi apne gosh-e-samaat pe bar hun

wo harf hun jise tira lahja mila nahin

is bhir mein hain sab wahi derina ajnabi

mere liye to ek bhi chehra naya nahin

naraz mujh se shahr ke bachche hain is liye

main un ke hath ban ke khilauna raha nahin

phenka hai kis ke hath ne patthar mein dekh lo

patthar se barh ke aur koi aina nahin

kis hausla se khud ko samete hue hun main

tuta hua zarur hun bikhra hua nahin

us se bichhar ke milti koi raushni to kya

ai badr mujh ko khud mira saya mila nahin