اب دل میں وہ رعنائیٔ احساس نہیں ہے

اب دل میں وہ رعنائیٔ احساس نہیں ہے

کس پھول میں ورنہ تری بو باس نہیں ہے

برباد محبت کی یہ آسودہ مزاجی

اب گردش دوراں کا بھی احساس نہیں ہے

کانٹوں پہ گزاری ہے سر بزم گلستاں

غنچوں کو تبسم کی ادا راس نہیں ہے

بخشے ہیں تری چشم عنایت نے وہ نشتر

اس دل کو تڑپنے کا بھی احساس نہیں ہے

مجبوریٔ فطرت ہے مرے لب کا تبسم

میرے دل مجروح کا عکاس نہیں ہے

غنچوں میں کہاں تیرے تبسم کی ادائیں

پھولوں میں تری نکہت انفاس نہیں ہے

دنیائے خلش نعمت غم یاس کا عالم

ہے کونسی دولت جو مرے پاس نہیں ہے

آ جائیے اب آپ مری خلوت غم میں

اس وقت مرا دل بھی مرے پاس نہیں ہے

ہر عکس میں آ جائے نظر بدرؔ وہ لیکن

روشن ابھی آئینۂ احساس نہیں ہے

ab dil mein wo raanai-e-ehsas nahin hai

kis phul mein warna tiri bu bas nahin hai

barbad mohabbat ki ye asuda mizaji

ab gardish-e-dauran ka bhi ehsas nahin hai

kanton pe guzari hai sar-e-bazm-e-gulistan

ghunchon ko tabassum ki ada ras nahin hai

bakhshe hain tiri chashm-e-inayat ne wo nashtar

is dil ko tarapne ka bhi ehsas nahin hai

majburi-e-fitrat hai mire lab ka tabassum

mere dil-e-majruh ka akkas nahin hai

ghunchon mein kahan tere tabassum ki adaen

phulon mein tiri nikhat anfas nahin hai

duniya-e-khalish nemat-e-gham yas ka alam

hai konasi daulat jo mire pas nahin hai

a jaiye ab ap miri khalwat-e-gham mein

is waqt mira dil bhi mire pas nahin hai

har aks mein a jae nazar badr wo lekin

raushan abhi aina-e-ehsas nahin hai