سکون دل کی طلب میں جو بے قرار نہیں

سکون دل کی طلب میں جو بے قرار نہیں

وہ اپنے درد محبت سے شرمسار نہیں

خوشی سے کون اٹھاتا ہے غم زمانے میں

یہ جبر وہ ہے کہ جس پر کچھ اختیار نہیں

سب اپنی ذات کی جانب ہیں آج گرم سفر

کوئی کسی کے لئے محو انتظار نہیں

کچھ اس طرح تری چشم کرم نے لوٹا ہے

مجھے خود اپنی تباہی کا اعتبار نہیں

نظر فریب بہاروں سے کھیلنے والے

تری نظر میں ابھی حاصل بہار نہیں

ہر ایک غم کا مداوا ہے خود فراموشی

وہ ہوشیار بہت ہے جو ہوشیار نہیں

جلاؤ بدرؔ شب غم چراغ اشکوں کے

کہ ان چمکتے ستاروں کا اعتبار نہیں

sukun-e-dil ki talab mein jo be qarar nahin

wo apne dard-e-mohabbat se sharmsar nahin

khushi se kaun uthata hai gham zamane mein

ye jabr wo hai ke jis par kuchh ikhtiyar nahin

sab apni zat ki janib hain aj garm-e-safar

koi kisi ke liye mahw-e-intizar nahin

kuchh is tarah tiri chashm-e-karam ne lauta hai

mujhe khud apni tabahi ka etibar nahin

nazar fareb-e-baharon se khelne wale

tiri nazar mein abhi hasil-e-bahar nahin

har ek gham ka mudawa hai khud faramoshi

wo hoshyar bahut hai jo hoshyar nahin

jalao badr shab-e-gham charagh ashkon ke

ke un chamakte sitaron ka etibar nahin