ہر لمحہ بحر وقت کی طغیانیوں میں ہوں

ہر لمحہ بحر وقت کی طغیانیوں میں ہوں

ٹھہروں کہاں کہ بہتے ہوئے پانیوں میں ہوں

بکھرا ہوا ہوں ٹوٹے ہوئے خواب کی طرح

دیکھا گیا ہوں جب سے پریشانیوں میں ہوں

حالات کی صلیب پہ لٹکا ہوا ہوں میں

مصروف اپنے آپ کی قربانیوں میں ہوں

یہ قید ٹوٹ جائے تو شاید سکوں ملے

میں اپنے ہی وجود کے زندانیوں میں ہوں

اب زخم زخم ہے مرے احساس کا بدن

شیشہ ہوں پتھروں کی نگہبانیوں میں ہوں

آباد مجھ سے ہے مرے خوابوں کی کائنات

میں وسعت خیال کی ویرانیوں میں ہوں

کیا خوش لباس لوگ ہیں شہر لباس میں

محسوس ہو رہا ہے کہ عریانیوں میں ہوں

اے بدرؔ سوز غم کا اجالا ہے ہر طرف

میں ظلمتوں میں رہ کے بھی تابانیوں میں ہوں

har lamha bahr waqt ki tughyaniyon mein hun

thahrun kahan ke bahte hue paniyon mein hun

bikhra hua hun tute hue khwab ki tarah

dekha gaya hun jab se pareshaniyon mein hun

halat ki salib pe latka hua hun main

masruf apne ap ki qurbaniyon mein hun

ye qaid tut jae to shayad sukun mile

main apne hi wajud ke zindaniyon mein hun

ab zakhm zakhm hai mire ehsas ka badan

shisha hun pattharon ki nigahbaniyon mein hun

abad mujh se hai mire khwabon ki kainat

main wusat-e-khayal ki wiraniyon mein hun

kya khush libas log hain shahr-e-libas mein

mahsus ho raha hai ke uryaniyon mein hun

ai badr soz-e-gham ka ujala hai har taraf

main zulmaton mein rah ke bhi tabaniyon mein hun