دلبر کہا رفیق کہا چارہ گر کہا

دلبر کہا رفیق کہا چارہ گر کہا

جو کچھ بھی تم کو ہم نے کہا سوچ کر کہا

وہ تم کہ ہم کو آج بھی مخلص نہ کہہ سکے

اور ہم نے ساری عمر تمہیں معتبر کہا

یہ رونقیں جہان کی منسوب تم سے کیں

پھر ان تجلیوں کو حریم نظر کہا

پرسش تری فریب تسلی تری فریب

وہ دل کی بات تھی جسے دنیا کا ڈر کہا

تیرے نقوش پا کو بتایا ہے کہکشاں

تیری گلی کے ذروں کو شمس و قمر کہا

سب مطمئن تھے دیکھ کے آزادیاں مری

میرے ضمیر نے مجھے بے بال و پر کہا

ان پر تو کوئی حرف نہ آنے دیا ضیاؔ

جو گزری اس کو گردش شام و سحر کہا

dilbar kaha rafiq kaha chara gar kaha

jo kuchh bhi tum ko ham ne kaha soch kar kaha

wo tum ke ham ko aj bhi mukhlis na kah sake

aur ham ne sari umr tumhen motabar kaha

ye raunaqen jahan ki mansub tum se kin

phir in tajalliyon ko harim-e-nazar kaha

pursish tiri fareb-e-tasalli tiri fareb

wo dil ki bat thi jise duniya ka dar kaha

tere nuqush-e-pa ko bataya hai kahkashan

teri gali ke zarron ko shams-o-qamar kaha

sab mutmain the dekh ke azadiyan miri

mere zamir ne mujhe be bal-o-par kaha

un par to koi harf na ane diya ziya

jo guzri us ko gardish-e-sham-o-sahar kaha