آج مائل بہ کرم اک بت رعنائی ہے

آج مائل بہ کرم اک بت رعنائی ہے

ساری دنیا مرے دامن میں سمٹ آئی ہے

حسن مصروف تجلی و خود آرائی ہے

وہ تماشہ ہی نہیں خود بھی تماشائی ہے

آپ سے پہلے کہاں غم سے شناسائی تھی

مل گئے آپ تو ہر غم سے شناسائی ہے

اس طرح دیکھنا جیسے مجھے دیکھا ہی نہیں

یہ ادا آپ کی خود مظہر یکتائی ہے

چند کلیاں ہی نہیں سارا چمن اپنا ہے

کون ٹوکے گا ہمیں کس کی قضا آئی ہے

جس میں دہکے ہوئے شعلے کی سی تاثیر نہ ہو

وہ ضیاؔ شعر نہیں قافیہ پیمائی ہے

aj mail ba karam ik but-e-raanai hai

sari duniya mire daman mein simat ai hai

husn masruf-e-tajalli-o-khud arai hai

wo tamasha hi nahin khud bhi tamashai hai

ap se pahle kahan gham se shanasai thi

mil gae ap to har gham se shanasai hai

is tarah dekhna jaise mujhe dekha hi nahin

ye ada ap ki khud mazhar-e-yaktai hai

chand kaliyan hi nahin sara chaman apna hai

kaun tokega hamen kis ki qaza ai hai

jis mein dahke hue shole ki si tasir na ho

wo ziya sher nahin qafiya paimai hai