تپش کیوں بڑھ رہی ہے راستوں کی

تپش کیوں بڑھ رہی ہے راستوں کی

قضا آنے کو ہے کیا آبلوں کی

ہمارے ہاتھ ہیرا ہو گئے ہیں

گھسائی کرتے کرتے پتھروں کی

ہوا کے ساتھ چلنا پڑ رہا ہے

بڑی مجبوریاں ہیں بادلوں کی

جہاں تک ساتھ لے جائیں ہوائیں

وہیں تک زندگی ہے خوشبوؤں کی

یقیناً پھول کوئی کھل گیا ہے

نہیں تو بھیڑ کیوں ہے تتلیوں کی

اسی کے سامنے روؤں گا جا کر

جو قیمت جانتا ہے آنسوؤں کی

ہٹا کر چاندؔ نے چہرے سے پردہ

زبانیں کاٹ دیں تاریکیوں کی

tapish kyun barh rahi hai raston ki

qaza ane ko hai kya ablon ki

hamare hath hira ho gae hain

ghisai karte karte pattharon ki

hawa ke sath chalna par raha hai

bari majburiyan hain badalon ki

jahan tak sath le jaen hawaen

wahin tak zindagi hai khushbuon ki

yaqinan phul koi khul gaya hai

nahin to bhir kyun hai titliyon ki

usi ke samne rounga ja kar

jo qimat janta hai ansuon ki

hata kar chand ne chehre se parda

zabanen kat den tarikiyon ki