وہی بلندی سے نیچے ہمیں گراتے ہیں

وہی بلندی سے نیچے ہمیں گراتے ہیں

وہ جن کے واسطے ہم سیڑھیاں بناتے ہیں

بکھرنے لگتے ہیں ہم کو سمیٹنے والے

کبھی کبھار تو ہم اتنا ٹوٹ جاتے ہیں

سکون ملتا ہے دل کو اسی وظیفے سے

ہم اپنے شعر اکیلے میں گنگناتے ہیں

انہیں سند نہیں ملتی کبھی محبت میں

جو سر بچاتے ہیں اور انگلیاں کٹاتے ہیں

اب اور اس سے زیادہ بھی ربط کیا ہوگا

وہ دھوپ میں ہوں پسینے میں ہم نہاتے ہیں

رسائی دھوپ کی ہوتی کہاں ہے کمرے میں

ہمارے کپڑے بدن پر ہی سوکھ جاتے ہیں

wahi bulandi se niche hamen girate hain

wo jin ke waste ham sirhiyan banate hain

bikharne lagte hain ham ko sametne wale

kabhi kabhar to ham itna tut jate hain

sukun milta hai dil ko isi wazife se

ham apne sher akele mein gungunate hain

unhen sanad nahin milti kabhi mohabbat mein

jo sar bachate hain aur ungliyan katite hain

ab aur is se ziyada bhi rabt kya hoga

wo dhup mein hun pasine mein ham nahate hain

rasai dhup ki hoti kahan hai kamre mein

hamare kapre badan par hi sukh jate hain