شدت بلا کی ہوتی ہے جس وقت پیاس میں

شدت بلا کی ہوتی ہے جس وقت پیاس میں

دریا دکھائی دیتا ہے خالی گلاس میں

وہ چیز ڈھونڈنے سے بھی ملتی ہے پھر کہاں

جو چیز کھوئی جاتی ہے ہوش و حواس میں

ان راستوں سے ہم کو گزارا فریب نے

کانٹے چھپے ہوئے تھے جہاں نرم گھاس میں

بے کار کر رہے ہیں شکایت نصیب سے

ریشم کے کیڑے پالنے والے کپاس میں

ہم نے قلم کی نوک چلا کر دماغ پر

ٹانکے ہیں بیل بوٹے غزل کے لباس میں

اے چاندؔ میری سمت ابھی اپنا رخ نہ کر

اس وقت کوئی اور ہے میرے قیاس میں

shiddat bala ki hoti hai jis waqt pyas mein

dariya dikhai deta hai khali gilas mein

wo chiz dhundne se bhi milti hai phir kahan

jo chiz khoi jati hai hosh-o-hawas mein

in raston se ham ko guzara fareb ne

kante chhupe hue the jahan narm ghas mein

be kar kar rahe hain shikayat nasib se

resham ke kire palne wale kapas mein

ham ne qalam ki nok chala kar dimagh par

tanke hain bel bute ghazal ke libas mein

ai chand meri samt abhi apna rukh na kar

is waqt koi aur hai mere qayas mein