Arooz is now on the App Store, for iPhone and iPad. Download →

All poetry

تو خفا مجھ سے ہوا کیا باعث

Bal Mukund Besabr (1812–1885)

تو خفا مجھ سے ہوا کیا باعث

جرم کیا مجھ سے ہوا کیا باعث

کس لیے دشمن جاں ہے تو گناہ

کون سا مجھ سے ہوا کیا باعث

کیوں دل آزار ہے تو کوئی قصور

دل سے یا مجھ سے ہوا کیا باعث

بس میں اس بت کے جو ڈالا ہے گناہ

کیا خدا مجھ سے ہوا کیا باعث

کیا جہت کیا ہے سبب کیا موجب

تو جدا مجھ سے ہوا کیا باعث

آج وہ لعبت چیں چیں بہ جبیں

بے خطا مجھ سے ہوا کیا باعث

رات بے صبرؔ وہ برہم ناحق

ناروا مجھ سے ہوا کیا باعث