چہرے پہ کسی کرب کی تنویر نہیں کی

چہرے پہ کسی کرب کی تنویر نہیں کی

محسوس ہی کرتے رہے تفسیر نہیں کی

قدموں کو حقیقت کی زمیں پر ہی دھرا ہے

خوش فہمی کی جنت کبھی تعمیر نہیں کی

واعظ کے کبھی نقش قدم پر نہ چلے ہم

خود کر کے دکھایا کبھی تقریر نہیں کی

معصوم چراغوں کو ہواؤں نے بجھایا

کیوں بھڑکے ہوئے شعلوں پہ تعذیر نہیں کی

اس کی ہی کہی بات کو دنیا نے نوازا

جس نے کبھی اظہار میں تاخیر نہیں کی

کس طرح زمانے کو خبر ہو گئی اس کی

وہ بات جو اشعار میں تحریر نہیں کی

کچھ خواب جو معراج تھے ہستی کے تبسمؔ

ان خوابوں کی میلی کبھی تعبیر نہیں کی

chehre pe kisi karb ki tanwir nahin ki

mahsus hi karte rahe tafsir nahin ki

qadmon ko haqiqat ki zamin par hi dhara hai

khush fahmi ki jannat kabhi taamir nahin ki

waiz ke kabhi naqsh-e-qadam par na chale ham

khud kar ke dikhaya kabhi taqrir nahin ki

maasum charaghon ko hawaon ne bujhaya

kyun bharke hue sholon pe taazir nahin ki

us ki hi kahi bat ko duniya ne nawaza

jis ne kabhi izhar mein takhir nahin ki

kis tarah zamane ko khabar ho gai us ki

wo bat jo ashar mein tahrir nahin ki

kuchh khwab jo meraj the hasti ke tabassum

in khwabon ki maili kabhi taabir nahin ki