روشنی اور اندھیروں کے سفر کا جادو

روشنی اور اندھیروں کے سفر کا جادو

دیکھتا رہتا ہوں میں شام و سحر کا جادو

رہبر و راہزن و راہ گزر کا جادو

کتنے جادو کا تماشا ہے سفر کا جادو

سو گئے چاند ستارے تو جگا ہے سورج

کر گیا رات کو دن پچھلے پہر کا جادو

آسماں پر نہیں کام آیا کرشمہ اس کا

ہو گیا رو بہ زمیں شمس و قمر کا جادو

خشک ہو جاتا ہے دریا بھی اثر سے اس کے

تم نے دیکھا ہی نہیں دیدۂ تر کا جادو

آؤ مل جائیں کبھی پھر نہ بچھڑنے کے لئے

ہم بھی دکھلائیں ذرا شیر و شکر کا جادو

raushni aur andheron ke safar ka jadu

dekhta rahta hun main sham-o-sahar ka jadu

rahbar-o-rahzan-o-rah guzar ka jadu

kitne jadu ka tamasha hai safar ka jadu

so gae chand sitare to jaga hai suraj

kar gaya rat ko din pichhle pahar ka jadu

asman par nahin kam aya karishma us ka

ho gaya ru ba zamin shams-o-qamar ka jadu

khushk ho jata hai dariya bhi asar se us ke

tum ne dekha hi nahin dida-e-tar ka jadu

ao mil jaen kabhi phir na bichharne ke liye

ham bhi dikhlaen zara sher-o-shakar ka jadu