سسکتی زندگی کو زندگانی کون دیتا ہے

سسکتی زندگی کو زندگانی کون دیتا ہے

خزاں کے بعد پھر سے رت سہانی کون دیتا ہے

مری آنکھوں میں صحراؤں کا منظر دیکھنے والو

تہ صحرا یہ دریا کو روانی کون دیتا ہے

نہیں مجھ سے کوئی شکوہ گلہ تو سچ بتاؤ پھر

مری باتوں کو رنگ بد گمانی کون دیتا ہے

شہہ کنعاں کی چاہت میں دوانی مصر کی ملکہ

اسی ملکہ کو پھر دور جوانی کون دیتا ہے

وہاں پر آب و گل سے روح کی تشکیل ہوتی ہے

یہاں لا کر شعور زندگانی کون دیتا ہے

مہک اٹھتا ہر اک گوشۂ شعر و سخن تیرا

صدفؔ ہونٹوں کو تیرے گل فشانی کون دیتا ہے

sisakti zindagi ko zindagani kaun deta hai

khizan ke baad phir se rut suhani kaun deta hai

miri ankhon mein sahraon ka manzar dekhne walo

tah-e-sahra ye dariya ko rawani kaun deta hai

nahin mujh se koi shikwa gila to sach batao phir

miri baton ko rang-e-bad gumani kaun deta hai

shah kanan ki chahat mein dawani misr ki malaka

isi malaka ko phir daur-e-jawani kaun deta hai

wahan par ab-o-gul se ruh ki tashkil hoti hai

yahan la kar shuur-e-zindagani kaun deta hai

mahak uthta har ik gosha-e-sher-o-sukhan tera

sadaf honton ko tere gul fishani kaun deta hai