ختم ہے بادل کی جب سے سائبانی دھوپ میں

ختم ہے بادل کی جب سے سائبانی دھوپ میں

آگ ہوتی جا رہی ہے زندگانی دھوپ میں

چاند کی آغوش میں ہونے سے جس کا ہے وجود

کھل سکے گی کیا بھلا وہ رات رانی دھوپ میں

اس کی فرقت کی تپش میں میں جھلس کر رہ گئی

ورنہ اتنی تاب کب تھی آسمانی دھوپ میں

کچھ چمکتا سا نظر آنے لگا ہے ریت میں

بڑھ رہی ہے میرے قدموں کی روانی دھوپ میں

ایک سایہ ساتھ میرے ہم سفر بن کر مرا

لکھ رہا ہے پھر کوئی تازہ کہانی دھوپ میں

khatm hai badal ki jab se saibani dhup mein

ag hoti ja rahi hai zindagani dhup mein

chand ki aghosh mein hone se jis ka hai wajud

khul sakegi kya bhala wo rat rani dhup mein

us ki furqat ki tapish mein main jhulas kar rah gai

warna itni tab kab thi asmani dhup mein

kuchh chamakta sa nazar ane laga hai ret mein

barh rahi hai mere qadmon ki rawani dhup mein

ek saya sath mere ham safar ban kar mira

likh raha hai phir koi taza kahani dhup mein