اک ایک لفظ کو برتوں گر اہتمام سے میں

اک ایک لفظ کو برتوں گر اہتمام سے میں

مقام اپنا بنا سکتا ہوں کلام سے میں

وگرنہ اس کی نظر مجھ پہ پڑ گئی ہوتی

خدا کا شکر پکارا گیا نہ نام سے میں

جواب میں مجھے ملتی ہے رات کی کالک

سوال کرتا ہوں جب بھی چراغ شام سے میں

اسی لیے تو مقدر پہ ناز ہے مجھ کو

کہ بادشاہ بنایا گیا غلام سے میں

لگا رہا ہوں صدا اپنے دل کے ایواں میں

بلا رہا ہوں تجھے کتنے احترام سے میں

وہ آگ مجھ میں بھڑکتی ہے جاں تڑکتی ہے

جو آگ لے گیا جلتے ہوئے خیام سے میں

سمجھ رہا تھا کہ ظہرابؔ ہوں مگر پھر بھی

نکل سکا نہ محبت تمھارے دام سے میں

ik ek lafz ko bartun gar ehtimam se main

maqam apna bana sakta hun kalam se main

wagarna us ki nazar mujh pe par gai hoti

khuda ka shukr pukara gaya na nam se main

jawab mein mujhe milti hai rat ki kalak

sawal karta hun jab bhi charagh-e-sham se main

isi liye to muqaddar pe naz hai mujh ko

ke badshah banaya gaya ghulam se main

laga raha hun sada apne dil ke aiwan mein

bala raha hun tujhe kitne ehtiram se main

wo ag mujh mein bharakti hai jan tarkti hai

jo ag le gaya jalte hue khayyam se main

samajh raha tha ke zohrab hun magar phir bhi

nikal saka na mohabbat tumhare dam se main