نہ کوئی صبح کا منظر نہ شام کی تصویر

نہ کوئی صبح کا منظر نہ شام کی تصویر

سکوت کھینچ رہا ہے کلام کی تصویر

رکھیں گے نقش محمد کا دل میں تاکہ رہے

ہمارے پاس ہمارے امام کی تصویر

یہ صبح و شام کے منظر میں وقت کا کردار

یہ روز و شب ہیں عجب اہتمام کی تصویر

پئیں گے دل سے شہادت کا جام برسر خاک

کہ ہے یہ موت ہمارے دوام کی تصویر

جہاں جہاں سے وہ گزرا زمانہ رک گیا تھا

ہر اک مقام نے کھینچی خرام کی تصویر

وہ آنکھ جس کو میسر ہو وہ نہیں رکھتا

یہ جام جم کا تصور یہ جام کی تصویر

زمیں پہ بجلی گرائی گئی ہے یوں ظہرابؔ

بنا رہا ہے خدا انہدام کی تصویر

na koi subh ka manzar na sham ki taswir

sukut khinch raha hai kalam ki taswir

rakhenge naqsh mohammad ka dil mein take rahe

hamare pas hamare imam ki taswir

ye subh-o-sham ke manzar mein waqt ka kirdar

ye roz-o-shab hain ajab ehtimam ki taswir

piyen ge dil se shahadat ka jam barsar-e-khak

ke hai ye maut hamare dawam ki taswir

jahan jahan se wo guzra zamana ruk gaya tha

har ik maqam ne khinchi khiram ki taswir

wo ankh jis ko muyassar ho wo nahin rakhta

ye jam-e-jam ka tasawwur ye jam ki taswir

zamin pe bijli girai gai hai yun zohrab

bana raha hai khuda inhidam ki taswir