سفر کی ظلمتوں میں یہ ستارہ چاہیے مجھ کو

سفر کی ظلمتوں میں یہ ستارہ چاہیے مجھ کو

ابھی تیری محبت کا سہارا چاہیے مجھ کو

کوئی تازہ بہت تازہ نظر کا زاویہ مل جائے

کوئی روشن بہت روشن نظارہ چاہیے مجھ کو

مرے الفاظ کی جھولی کہیں خالی نہ رہ جائے

یہ جو سرمایۂ غم ہے یہ سارا چاہیے مجھ کو

کوئی برسات کا بادل یہاں بار دگر آئے

دھنک جیسا کوئی لمحہ دوبارہ چاہیے مجھ کو

خدائے بحر مجھ کو پانیوں میں سانس دی توں نے

مگر اب اس سمندر سے کنارہ چاہئے مجھ کو

ابھی تو اک ستارے پر قدم میں نے جمائے ہیں

ابھی تو آسماں سارے کا سارا چاہیے مجھ کو

تری خواہش کے آنگن میں ہو میرے پیار کی چھایا

مکمل اس حویلی پر اجارا چاہیے مجھ کو

ابھی ظہرابؔ اس کو دیکھتا ہوں چشم حیرت سے

ابھی دریاے حیرت کا کنارہ چاہیے مجھ کو

safar ki zulmaton mein ye sitara chahiye mujh ko

abhi teri mohabbat ka sahara chahiye mujh ko

koi taza bahut taza nazar ka zawiya mil jae

koi raushan bahut raushan nazara chahiye mujh ko

mire alfaz ki jholi kahin khali na rah jae

ye jo sarmaya-e-gham hai ye sara chahiye mujh ko

koi barsat ka badal yahan bar-e-digar ae

dhanak jaisa koi lamha dobara chahiye mujh ko

khuda-e-bahr mujh ko paniyon mein sans di tun ne

magar ab is samundar se kinara chahiye mujh ko

abhi to ik sitare par qadam main ne jamae hain

abhi to asman sare ka sara chahiye mujh ko

tiri khwahish ke angan mein ho mere pyar ki chhaya

mukammal is haweli par ijara chahiye mujh ko

abhi zohrab us ko dekhta hun chashm-e-hairat se

abhi dariya-e-hairat ka kinara chahiye mujh ko