بڑی حسین و طرب زا کتاب پڑھتا ہوں

بڑی حسین و طرب زا کتاب پڑھتا ہوں

میں ان کا قصۂ اوج شباب پڑھتا ہوں

کبھی کبھی تو میں اک سطر بھی نہیں پڑھتا

کبھی کتاب کے بعد از کتاب پڑھتا ہوں

خط ان کا ہاتھ میں ہے دل پہ بے خودی طاری

میں خط کہاں خط جام شراب پڑھتا ہوں

نظر سے ان کی ملا کر نظر سر محفل

میں ہر سوال کا اپنے جواب پڑھتا ہوں

ردائے لالہ و گل بھی کتاب کا ہے ورق

میں اس میں قصۂ حسن و شباب پڑھتا ہوں

کبھی تو یوں بھی مری زندگی لگی ہے مجھے

کہ جیسے میں کسی مجنوں کا خواب پڑھتا ہوں

اسی میں مجھ کو ملا میرے درد کا درماں

اسی لیے تو میں ام الکتاب پڑھتا ہوں

جو خط بھی لکھوں تو فوراً جواب آتا ہے

میں روز ان کا جواب الجواب پڑھتا ہوں

کسے ہے شوق جمالیؔ غزل سنانے کا

بہ حکم صدر فضیلت مآب پڑھتا ہوں

bari hasin-o-tarab za kitab parhta hun

main un ka qissa-e-auj-e-shabab parhta hun

kabhi kabhi to main ik satr bhi nahin parhta

kabhi kitab ke baad az kitab parhta hun

khat un ka hath mein hai dil pe be khudi tari

main khat kahan khat jam-e-sharab parhta hun

nazar se un ki mila kar nazar sar-e-mahfil

main har sawal ka apne jawab parhta hun

rida-e-lala-o-gul bhi kitab ka hai waraq

main is mein qissa-e-husn-o-shabab parhta hun

kabhi to yun bhi miri zindagi lagi hai mujhe

ke jaise main kisi majnun ka khwab parhta hun

isi mein mujh ko mila mere dard ka darman

isi liye to main um alkitab parhta hun

jo khat bhi likhun to fauran jawab ata hai

main roz un ka jawab aljawab parhta hun

kise hai shauq jamali ghazal sunane ka

ba hukm sadr-e-fazilat mab parhta hun