ہم نے دیکھے زندگی میں چند ایسے سرپھرے

ہم نے دیکھے زندگی میں چند ایسے سرپھرے

دشمنوں میں جو پیام دوستی لے کر پھرے

وائے یہ تحت شعور اپنا بلا سا بن گیا

اپنی آنکھوں میں بڑے نادیدنی منظر پھرے

جب بھی وہ آئے کھلی عیش و طرب کی چاندنی

دن مرے ظلمت کدہ کے اس طرح اکثر پھرے

کیا کوئی شہر تمنا پھر اجڑ کر بس گیا

جابران وقت کیوں خنجر لئے گھر گھر پھرے

شب کو اکثر ہم سفر تھی ٹھنڈی ٹھنڈی چاندنی

دن کو ہم جلتا ہوا سورج لئے سر پر پھرے

نیند کیا آتی شب ہجراں کے اس ماحول میں

ہم کبھی بیٹھے کبھی اٹھے کبھی اٹھ کر پھرے

دم غنیمت ہے جمالیؔ آپ کا اس دور میں

اب زمانے میں کہاں ہیں آپ جیسے سرپھرے

ham ne dekhe zindagi mein chand aise sarphire

dushmanon mein jo payam-e-dosti le kar phire

wae ye taht-e-shuur apna bala sa ban gaya

apni ankhon mein bare nadidni manzar phire

jab bhi wo ae khuli aish-o-tarab ki chandni

din mire zulmat kada ke is tarah aksar phire

kya koi shahr-e-tamanna phir ujar kar bas gaya

jabiran-e-waqt kyun khanjar liye ghar ghar phire

shab ko aksar ham safar thi thandi thandi chandni

din ko ham jalta hua suraj liye sar par phire

nind kya ati shab-e-hijran ke is mahaul mein

ham kabhi baithe kabhi uthe kabhi uth kar phire

dam ghanimat hai jamali ap ka is daur mein

ab zamane mein kahan hain ap jaise sarphire