وہی جو منزل‌ شمس و قمر میں رہتا ہے

وہی جو منزل‌ شمس و قمر میں رہتا ہے

وہ حسن بن کے ہماری نظر میں رہتا ہے

نظر کو اپنی چھپائے ہوئے ہوں میں سب سے

کہ ایک پردہ نشیں اس نظر میں رہتا ہے

تمہاری دید کا ارماں جو گھٹ گیا دل میں

وہ بن کے نالہ تلاش اثر میں رہتا ہے

اسیر زلف پریشاں ہوں اس لئے اے دوست

مرا خیال ہمیشہ سفر میں رہتا ہے

قفس کی زندگیٔ بے مزہ کو کب حاصل

جو لطف یورش برق و شرر میں رہتا ہے

جدھر نگاہ اٹھاؤں اسی کا عکس ابھرے

اسی کا جلوہ جمالیؔ نظر میں رہتا ہے

wahi jo manzil shams-o-qamar mein rahta hai

wo husn ban ke hamari nazar mein rahta hai

nazar ko apni chhupae hue hun main sab se

ke ek parda nashin is nazar mein rahta hai

tumhari did ka arman jo ghut gaya dil mein

wo ban ke nala talash-e-asar mein rahta hai

asir-e-zulf-e-pareshan hun is liye ai dost

mira khayal hamesha safar mein rahta hai

qafas ki zindagi-e-be maza ko kab hasil

jo lutf yurish-e-barq-o-sharar mein rahta hai

jidhar nigah uthaun usi ka aks ubhre

usi ka jalwa jamali nazar mein rahta hai