ہر غم پہ آج کل ہے خوشی کا گماں مجھے

ہر غم پہ آج کل ہے خوشی کا گماں مجھے

لے آئی یاد یار کہاں سے کہاں مجھے

منظور ذوق دید کا ہو امتحاں مجھے

یہ تاب یہ مجال یہ طاقت کہاں مجھے

یا رب قفس کی خیر کہ دیکھا جو خواب بھی

آیا ہے بجلیوں میں نظر آشیاں مجھے

آزادئ خیال کے وہ رنگ اب کہاں

تھا ابتدا میں کنج قفس آشیاں مجھے

ذوق طلب کا راز یہی زندگی یہی

ہر کارواں ہے گرد پس کارواں مجھے

میں جان رنگ و بو ہوں میں آرائش چمن

تو کیا سمجھ رہا ہے مرے باغباں مجھے

تیور نگاہ ناز کے کچھ دن یہی جو ہیں

یارائے ضبط راز جمالیؔ کہاں مجھے

har gham pe aj kal hai khushi ka guman mujhe

le ai yad-e-yar kahan se kahan mujhe

manzur zauq-e-did ka ho imtihan mujhe

ye tab ye majal ye taqat kahan mujhe

ya rab qafas ki khair ke dekha jo khwab bhi

aya hai bijliyon mein nazar ashiyan mujhe

azadi-e-khayal ke wo rang ab kahan

tha ibtida mein kunj-e-qafas ashiyan mujhe

zauq-e-talab ka raz yahi zindagi yahi

har karwan hai gard pas karwan mujhe

main jan rang-o-bu hun main araish-e-chaman

to kya samajh raha hai mire baghban mujhe

tewar nigah-e-naz ke kuchh din yahi jo hain

yara-e-zabt-e-raz jamali kahan mujhe