کیا خبر تجھ کو او دامن کو چھڑانے والے

کیا خبر تجھ کو او دامن کو چھڑانے والے

اور بھی ہیں مجھے سینے سے لگانے والے

ناپتے کیسے مرے ظرف کی گہرائی کو

ڈبکیاں خطۂ ساحل میں لگانے والے

اے ہواؤ نہ کہیں ہاتھ جلا لو تم بھی

بجھ گئے میرے چراغوں کو بجھانے والے

جسم مر سکتا ہے آواز نہیں مرتی ہے

یاد رکھیں مری آواز دبانے والے

خود کو کیسے کسی منزل کے حوالے کرتا

منتظر تھے مری آمد کے زمانے والے

باپ کی قبر پہ مٹی بھی نہیں ڈالتے ہیں

پھول نیتاؤں کی قبروں پہ چڑھانے والے

kya khabar tujh ko o daman ko chhurane wale

aur bhi hain mujhe sine se lagane wale

napte kaise mire zarf ki gahrai ko

dubkiyan khitta-e-sahil mein lagane wale

ai hawao na kahin hath jala lo tum bhi

bujh gae mere charaghon ko bujhane wale

jism mar sakta hai awaz nahin marti hai

yad rakhen miri awaz dabane wale

khud ko kaise kisi manzil ke hawale karta

muntazir the miri amad ke zamane wale

bap ki qabr pe mitti bhi nahin dalte hain

phul netaon ki qabron pe charhane wale