خانۂ دل کو سجاؤ گے تو یاد آؤں گا

خانۂ دل کو سجاؤ گے تو یاد آؤں گا

پیار کی شمع جلاؤ گے تو یاد آؤں گا

بھیگے منظر میں مرا عکس دکھائی دے گا

بارشوں میں جو نہاؤ گے تو یاد آؤں گا

ہوگی محسوس تمہیں میری وفا کی خوشبو

تم کوئی خوشبو لگاؤ گے تو یاد آؤں گا

جب بھی آئے گا تمہیں سجنے سنورنے کا خیال

پاس آئینے کے جاؤ گے تو یاد آؤں گا

روٹھ جانے پہ کوئی جب نہ منائے گا تمہیں

اور تم سب کو مناؤ گے تو یاد آؤں گا

اپنی تنہائی کو تم جب بھی سکوت شب میں

میری غزلوں کو سناؤ گے تو یاد آؤں گا

بھولنے کے لئے مجھ کو مری یادوں کے نقوش

صفحۂ دل سے مٹاؤ گے تو یاد آؤں گا

khana-e-dil ko sajaoge to yad aunga

pyar ki shama jalaoge to yad aunga

bhige manzar mein mira aks dikhai dega

barishon mein jo nahaoge to yad aunga

hogi mahsus tumhen meri wafa ki khushbu

tum koi khushbu lagaoge to yad aunga

jab bhi aega tumhen sajne sanwarne ka khayal

pas aine ke jaoge to yad aunga

ruth jane pe koi jab na manaega tumhen

aur tum sab ko manaoge to yad aunga

apni tanhai ko tum jab bhi sukut-e-shab mein

meri ghazlon ko sunaoge to yad aunga

bhulne ke liye mujh ko miri yadon ke nuqush

safha-e-dil se mitaoge to yad aunga