فرش مخمل پہ کبھی نیند نہ آئی مجھ کو

فرش مخمل پہ کبھی نیند نہ آئی مجھ کو

اتنی راس آئی مرے گھر کی چٹائی مجھ کو

بات ساحل کی جو ہوتی تو سنبھل بھی جاتا

اس نے منجدھار میں اوقات بتائی مجھ کو

عزم پر میرے مسلط ہے جنوں منزل کا

کیسے روکے گی مری آبلہ پائی مجھ کو

جس نے جس طرح سے چاہا مجھے بدنام کیا

راس آئی نہیں دنیا کی بھلائی مجھ کو

ظلمت شب میں میں تنہا ہی لڑوں گا عالمؔ

ان چراغوں نے اگر آنکھ دکھائی مجھ کو

farsh makhmal pe kabhi nind na ai mujh ko

itni ras ai mire ghar ki chatai mujh ko

bat sahil ki jo hoti to sambhal bhi jata

us ne manjdhar mein auqat batai mujh ko

azm par mere musallat hai junun manzil ka

kaise rokegi miri abla pai mujh ko

jis ne jis tarah se chaha mujhe badnam kiya

ras ai nahin duniya ki bhalai mujh ko

zulmat-e-shab mein main tanha hi larunga alam

in charaghon ne agar ankh dikhai mujh ko