جانے کیوں محبت میں دل کشی نہیں ملتی

جانے کیوں محبت میں دل کشی نہیں ملتی

دوست روز ملتے ہیں دوستی نہیں ملتی

زندگی اگر چاہو فاقہ مست بن جاؤ

روغنی نوالوں سے زندگی نہیں ملتی

مسلک فقیری میں جو خوشی میسر ہے

تخت بادشاہی پر وہ خوشی نہیں ملتی

ادھ کھلی کلی شاید باغباں نے پھر توڑی

کیوں گلوں کے چہروں پر تازگی نہیں ملتی

ان کو کوئی سمجھائے اپنا جائزہ لے لیں

جن کو اپنے سجدوں میں چاشنی نہیں ملتی

دل مرا اندھیرے میں آج بھی بھٹکتا ہے

روشنی کی دنیا میں روشنی نہیں ملتی

زرد زرد چہرے ہیں خوف مرگ سے عالمؔ

اب تو کوئی بھی صورت چاند سی نہیں ملتی

jane kyun mohabbat mein dil kashi nahin milti

dost roz milte hain dosti nahin milti

zindagi agar chaho faqa mast ban jao

raughni nawalon se zindagi nahin milti

maslak-e-faqiri mein jo khushi muyassar hai

takht-e-badshahi par wo khushi nahin milti

adh khuli kali shayad baghban ne phir tori

kyun gulon ke chehron par tazgi nahin milti

un ko koi samjhae apna jaiza le len

jin ko apne sajdon mein chashni nahin milti

dil mira andhere mein aj bhi bhatakta hai

raushni ki duniya mein raushni nahin milti

zard zard chehre hain khauf marg se alam

ab to koi bhi surat chand si nahin milti