رنگ ایثار کے چہرے کا نکھرتا کیسے

رنگ ایثار کے چہرے کا نکھرتا کیسے

زخم احباب نہ دیتے تو سنورتا کیسے

مری قسمت میں بلندی کا سفر لکھا تھا

سازش وقت سے پستی میں اترتا کیسے

حوصلہ تھا مرا مضبوط پہاڑوں کی طرح

ٹوٹ کر تنکوں کی مانند بکھرتا کیسے

سایہ تھا ہی نہیں مالی کا چمن کے سر پر

رنگ پھولوں کا یتیمی میں نکھرتا کیسے

مدتوں رہنا تھا جس پیڑ کے سائے میں مجھے

اس کی شاخوں کو بتاؤ میں کترتا کیسے

میں نے چاہا تھا ذرا دیر وہ ٹھہرے عالمؔ

وہ تو بہتا ہوا دریا تھا ٹھہرتا کیسے

rang isar ke chehre ka nikharta kaise

zakhm ahbab na dete to sanwarta kaise

miri qismat mein bulandi ka safar likha tha

sazish-e-waqt se pasti mein utarta kaise

hausla tha mira mazbut paharon ki tarah

tut kar tinkon ki manind bikharta kaise

saya tha hi nahin mali ka chaman ke sar par

rang phulon ka yatimi mein nikharta kaise

muddaton rahna tha jis per ke sae mein mujhe

us ki shakhon ko batao mein katarta kaise

main ne chaha tha zara der wo thahre alam

wo to bahta hua dariya tha thaharta kaise