بے وفا اب نہ محبت کی دہائی دوں گا

بے وفا اب نہ محبت کی دہائی دوں گا

زندگی بھر میں تجھے زخم جدائی دوں گا

جو مجھے جیسا سمجھتا ہے سمجھنے دیجے

اپنے بارے میں کہاں تک میں صفائی دوں گا

میرے حصے میں بھی آیا ہے بلندی کا سفر

آسماں والوں تمہیں میں بھی دکھائی دوں گا

بخش دے گا وہ مری ساری خطائیں فوراً

اس کی رحمت کی اسے اتنی دہائی دوں گا

اپنے ماں باپ کو کاندھا بھی نہیں دے پایا

جو یہ کہتا تھا انہیں ساری کمائی دوں گا

میں سفیران محبت کی صدا ہوں عالمؔ

مر بھی جاؤں تو زمانے کو سنائی دوں گا

be wafa ab na mohabbat ki duhai dunga

zindagi bhar mein tujhe zakhm-e-judai dunga

jo mujhe jaisa samajhta hai samajhne dije

apne bare mein kahan tak main safai dunga

mere hisse mein bhi aya hai bulandi ka safar

asman walon tumhen main bhi dikhai dunga

bakhsh dega wo miri sari khataen fauran

us ki rahmat ki use itni duhai dunga

apne man bap ko kandha bhi nahin de paya

jo ye kahta tha unhen sari kamai dunga

main safiran-e-mohabbat ki sada hun alam

mar bhi jaun to zamane ko sunai dunga