زمانے پر عیاں میرا ہنر ہونے نہیں دیتا

زمانے پر عیاں میرا ہنر ہونے نہیں دیتا

نہ جانے کیوں مجھے وہ معتبر ہونے نہیں دیتا

وہ ظالم اپنی یادوں سے سدا آباد رکھتا ہے

مرے ٹوٹے ہوئے دل کو کھنڈر ہونے نہیں دیتا

خدا کے فضل سے پائی ہے وہ احساس کی دولت

کسی بھی بات کو میں درگزر ہونے نہیں دیتا

ہمیشہ اس ادا سے وہ مری امداد کرتا ہے

ذرا بھی میری غیرت کو خبر ہونے نہیں دیتا

کئی موسم کوئی رت ہو تصور اس کے چہرے کا

کسی جلوے کو محبوب نظر ہونے نہیں دیتا

تو مجھ سے اس کی یادوں کا اثاثہ چھین لے یا رب

یہ میری خواہشوں کو مختصر ہونے نہیں دیتا

zamane par ayan mera hunar hone nahin deta

na jane kyun mujhe wo motabar hone nahin deta

wo zalim apni yadon se sada abad rakhta hai

mire tute hue dil ko khandar hone nahin deta

khuda ke fazl se pai hai wo ehsas ki daulat

kisi bhi bat ko main darguzar hone nahin deta

hamesha is ada se wo miri imdad karta hai

zara bhi meri ghairat ko khabar hone nahin deta

kai mausam koi rut ho tasawwur us ke chehre ka

kisi jalwe ko mahbub-e-nazar hone nahin deta

tu mujh se us ki yadon ka asasa chhin le ya rab

ye meri khwahishon ko mukhtasar hone nahin deta