یہ الگ بات کہ فرصت بھی نہیں ملتی ہے

یہ الگ بات کہ فرصت بھی نہیں ملتی ہے

خود سے مل کر ہمیں راحت بھی نہیں ملتی ہے

ہم تو کرنا بھی نہیں چاہتے دل کا سودا

اور مناسب ہمیں قیمت بھی نہیں ملتی ہے

عشق وہ جرم ہے اس جرم کو کرنے والو

اس کے مجرم کو ضمانت بھی نہیں ملتی ہے

دوڑتے بھی نہیں شہرت کے ہم آگے پیچھے

اور آسانی سے شہرت بھی نہیں ملتی ہے

ہر جگہ لوگ مہذب بھی نہیں ہوتے ہیں

ہر جگہ دوستو عزت بھی نہیں ملتی ہے

ہم نے مانا کہ برے آپ نہیں ہیں لیکن

آپ میں کوئی شرافت بھی نہیں ملتی ہے

عیش بیٹے کی کمائی سے بہو کرتی ہے

ماں کو اب دودھ کی اجرت بھی نہیں ملتی ہے

ہر کسی سے نہیں رکھتا ہوں میں رشتہ عالمؔ

ہر کسی سے یہ طبیعت بھی نہیں ملتی ہے

ye alag bat ke fursat bhi nahin milti hai

khud se mil kar hamen rahat bhi nahin milti hai

ham to karna bhi nahin chahte dil ka sauda

aur munasib hamen qimat bhi nahin milti hai

ishq wo jurm hai is jurm ko karne walo

us ke mujrim ko zamanat bhi nahin milti hai

daurte bhi nahin shohrat ke ham age pichhe

aur asani se shohrat bhi nahin milti hai

har jagah log mohazzab bhi nahin hote hain

har jagah dosto izzat bhi nahin milti hai

ham ne mana ke bure ap nahin hain lekin

ap mein koi sharafat bhi nahin milti hai

aish bete ki kamai se bahu karti hai

man ko ab dudh ki ujrat bhi nahin milti hai

har kisi se nahin rakhta hun main rishta alam

har kisi se ye tabiat bhi nahin milti hai