وہ تصور میں تو آتا ہے چلا جاتا ہے

وہ تصور میں تو آتا ہے چلا جاتا ہے

دھڑکنیں دل کی بڑھاتا ہے چلا جاتا ہے

ہونے لگتا ہے مجھے جب بھی تکبر کا گماں

کوئی آئینہ دکھاتا ہے چلا جاتا ہے

کوئی درویش مجھے روز سوالی بن کر

خواب غفلت سے جگاتا ہے چلا جاتا ہے

کون ہے دوست یہاں کون ہمارا دشمن

گردش وقت بتاتا ہے چلا جاتا ہے

میری تربت پہ سر شام دعاؤں کا چراغ

کوئی اشکوں سے جلاتا ہے چلا جاتا ہے

بیٹھ جاتا ہوں رہ عشق میں تھک کر تو جنوں

منزل شوق بڑھاتا ہے چلا جاتا ہے

وقت آتا ہے دبے پاؤں ہمیشہ عالمؔ

سب کی اوقات بتاتا ہے چلا جاتا ہے

wo tasawwur mein to ata hai chala jata hai

dharkanen dil ki barhata hai chala jata hai

hone lagta hai mujhe jab bhi takabbur ka guman

koi aina dikhata hai chala jata hai

koi darwesh mujhe roz sawali ban kar

khwab-e-ghaflat se jagata hai chala jata hai

kaun hai dost yahan kaun hamara dushman

gardish-e-waqt batata hai chala jata hai

meri turbat pe sar-e-sham duaon ka charagh

koi ashkon se jalata hai chala jata hai

baith jata hun rah-e-ishq mein thak kar to junun

manzil-e-shauq barhata hai chala jata hai

waqt ata hai dabe paon hamesha alam

sab ki auqat batata hai chala jata hai