اپنی خودی کو تم سر بازار بیچ کر

اپنی خودی کو تم سر بازار بیچ کر

زندہ ہو کیسے دولت کردار بیچ کر

یا رب یہ کیا عذاب ہے نسل جدید پر

کرتی ہے عیش پرکھوں کی دستار بیچ کر

حاصل کی اس کے بیٹے نے کرسی مدیر کی

اتنا پڑھایا باپ نے اخبار بیچ کر

اس بد نصیب باپ کی مجبوریاں نہ پوچھ

خوشیاں خریدتا ہے جو گھر بار بیچ کر

مہنگی بہت پڑی مجھے سورج کی دوستی

پچھتا رہا ہوں سایۂ دیوار بیچ کر

جن کو شعور بندگی کرتا ہے رب عطا

جنگل خرید لیتے ہیں گھر بار بیچ کر

عالمؔ اسی طرح سے جو ہم منتشر رہے

کھا جائیں گے وطن کو یہ غدار بیچ کر

apni khudi ko tum sar-e-bazar bech kar

zinda ho kaise daulat-e-kirdar bech kar

ya rab ye kya azab hai nasl-e-jadid par

karti hai aish purkhon ki dastar bech kar

hasil ki us ke bete ne kursi mudir ki

itna parhaya bap ne akhbar bech kar

is bad nasib bap ki majburiyan na puchh

khushiyan kharidta hai jo ghar bar bech kar

mahngi bahut pari mujhe suraj ki dosti

puchhta raha hun saya-e-diwar bech kar

jin ko shuur-e-bandagi karta hai rab ata

jangal kharid lete hain ghar bar bech kar

alam isi tarah se jo ham muntashir rahe

kha jaenge watan ko ye ghaddar bech kar