جس کی خاطر سارا زمانہ چھوڑ دیا

جس کی خاطر سارا زمانہ چھوڑ دیا

اس نے میرا فون اٹھانا چھوڑ دیا

ساری ساری رات ستانا چھوڑ دیا

تم نے کیوں خوابوں میں آنا چھوڑ دیا

ان کی غلط فہمی کو کہاں تک دور کریں

روٹھے ہوؤں کو ہم نے منانا چھوڑ دیا

جب سے حقیقت سامنے آئی خوابوں کی

تصویروں سے دل بہلانا چھوڑ دیا

پوچھ رہی ہیں آ کر موجیں ساحل سے

اس نے کیوں پنگھٹ پر آنا چھوڑ دیا

ہر دن اس کے پاگل پن سے تنگ آ کر

میں نے اس دل کو سمجھانا چھوڑ دیا

دوست بنا کر دھوکہ دیا جب سے اس نے

ہم نے زیادہ دوست بنانا چھوڑ دیا

عالمؔ جن سے مل نہ سکا دل برسوں سے

ہم نے ان سے ہاتھ ملانا چھوڑ دیا

jis ki khatir sara zamana chhor diya

us ne mera fon uthana chhor diya

sari sari rat satana chhor diya

tum ne kyun khwabon mein ana chhor diya

un ki ghalat fahmi ko kahan tak dur karen

ruthe huon ko ham ne manana chhor diya

jab se haqiqat samne ai khwabon ki

taswiron se dil bahlana chhor diya

puchh rahi hain a kar maujen sahil se

us ne kyun panghat par ana chhor diya

har din us ke pagal pan se tang a kar

main ne is dil ko samjhana chhor diya

dost bana kar dhoka diya jab se us ne

ham ne ziyada dost banana chhor diya

alam jin se mil na saka dil barson se

ham ne un se hath milana chhor diya