ایسا لگتا ہے وہ نادان سمجھتے ہیں مجھے

ایسا لگتا ہے وہ نادان سمجھتے ہیں مجھے

جو بھی تفریح کا سامان سمجھتے ہیں مجھے

خیریت بھی مری معلوم نہیں کرتے ہیں

اسقدر لوگ پریشان سمجھتے ہیں مجھے

شہر سے آؤ تو آنے کا سبب پوچھتے ہیں

گاؤں کے لوگ بھی مہمان سمجھتے ہیں مجھے

اس لئے میری خوشامد نہیں کرتا کوئی

سب منانا بہت آسان سمجھتے ہیں مجھے

میں ہوں فنکار تو فنکار ہی سمجھا جائے

آپ کیوں ہندو مسلمان سمجھتے ہیں مجھے

میں نے ہر زخم پہ مرہم کی نمائش کی ہے

جانے کیوں لوگ نمکدان سمجھتے ہیں مجھے

لوگ کیا کہتے ہیں پرواہ نہیں ہے عالمؔ

اتنا کافی ہے کہ انسان سمجھتے ہیں مجھے

aisa lagta hai wo nadan samajhte hain mujhe

jo bhi tafrih ka saman samajhte hain mujhe

khairiyat bhi miri maalum nahin karte hain

usqadar log pareshan samajhte hain mujhe

shahr se ao to ane ka sabab puchhte hain

gaon ke log bhi mehman samajhte hain mujhe

is liye meri khushamad nahin karta koi

sab manana bahut asan samajhte hain mujhe

main hun fankar to fankar hi samjha jae

ap kyun hindu musalman samajhte hain mujhe

main ne har zakhm pe marham ki numaish ki hai

jane kyun log namakdan samajhte hain mujhe

log kya kahte hain parwah nahin hai alam

itna kafi hai ke insan samajhte hain mujhe