جس طرح بچے بزرگوں کے چرن چومتے ہیں

جس طرح بچے بزرگوں کے چرن چومتے ہیں

ہم محبت سے محبت کا بدن چومتے ہیں

منہ لگاتے نہیں بازار کے پھولوں کو کبھی

ہم فقط اپنے گلابوں کے دہن چومتے ہیں

میں نے حالات پہ رکھی ہے غزل کی بنیاد

اس لئے لوگ مرا رنگ سخن چومتے ہیں

منہ پہ مل لیتے ہیں ہم خاک مدینہ کی طرح

ماں کے قدموں کی طرح خاک وطن چومتے ہیں

زندگی میں تو انہیں بوجھ سمجھتے ہیں مگر

لوگ مرنے پہ بزرگوں کا کفن چومتے ہیں

اور بڑھ جاتا ہے منزل پہ پہنچنے کا سرور

آبلے جب مرے پیروں کی تھکن چومتے ہیں

jis tarah bachche buzurgon ke charan chumte hain

ham mohabbat se mohabbat ka badan chumte hain

munh lagate nahin bazar ke phulon ko kabhi

ham faqat apne gulabon ke dahan chumte hain

main ne halat pe rakhi hai ghazal ki buniyad

is liye log mira rang-e-sukhan chumte hain

munh pe mil lete hain ham khak madina ki tarah

man ke qadmon ki tarah khak-e-watan chumte hain

zindagi mein to unhen bojh samajhte hain magar

log marne pe buzurgon ka kafan chumte hain

aur barh jata hai manzil pe pahunchne ka surur

able jab mire pairon ki thakan chumte hain