خلوص پیار کا اب کوئی سلسلہ بھی نہیں

خلوص پیار کا اب کوئی سلسلہ بھی نہیں

دلوں کے بیچ وہ پہلا سا رابطہ بھی نہیں

ہمارا ان کا کوئی اب تو واسطہ بھی نہیں

کچھ اس طرح سے الگ ہیں کہ تذکرہ بھی نہیں

میں دیکھتا ہوں تماشہ وہ کھنچ رہے ہیں بہت

کمال یہ ہے کشیدہ معاملہ بھی نہیں

عجب سکوت ہے طاری خموش ہیں دونوں

نہ ان کو کوئی شکایت مجھے گلہ بھی نہیں

اب ایسے موڑ پہ آکر الگ الگ ہیں کھڑے

قریب تر بھی نہیں اور فاصلہ بھی نہیں

نہ روشنی نہ اندھیرا عجیب منظر ہے

طلوع صبح نہیں شام اب سیہ بھی نہیں

سنے تو کوئی ذرا ہوش و گوش سے اک دن

ہماری بات کا مفہوم بد مزہ بھی نہیں

کسی سے کوئی شکایت نہیں یہ دل میرا

جو خوش نصیب نہیں ہے تو غم زدہ بھی نہیں

بتائے یاسؔ کہ اس دل کو کس سے دیں تشبیہ

نہیں ہے سنگ صفت تو گداختہ بھی نہیں

khulus pyar ka ab koi silsila bhi nahin

dilon ke bich wo pahla sa rabta bhi nahin

hamara un ka koi ab to wasta bhi nahin

kuchh is tarah se alag hain ke tazkira bhi nahin

main dekhta hun tamasha wo khinch rahe hain bahut

kamal ye hai kashida muamla bhi nahin

ajab sukut hai tari khamosh hain donon

na un ko koi shikayat mujhe gila bhi nahin

ab aise mor pe akar alag alag hain khare

qarib tar bhi nahin aur fasla bhi nahin

na raushni na andhera ajib manzar hai

tulu-e-subh nahin sham ab siyah bhi nahin

sune to koi zara hosh-o-gosh se ik din

hamari bat ka mafhum bad maza bhi nahin

kisi se koi shikayat nahin ye dil mera

jo khush nasib nahin hai to gham zada bhi nahin

batae yas ke is dil ko kis se den tashbih

nahin hai sang sifat to gudakhta bhi nahin