خودداریوں کی حد سے نکلنا پڑا مجھے

خودداریوں کی حد سے نکلنا پڑا مجھے

ماحول کی چتاؤں میں جلنا پڑا مجھے

وہ مصلحت تھی کیا تھی مجھے کچھ نہیں پتہ

اپنا ہر اک اصول بدلنا پڑا مجھے

سوچا تھا میں رہوں گا ہمیشہ عروج پر

سورج کی طرح شام کو ڈھلنا پڑا مجھے

ماں کے حسین چاند سے چہرے کو دیکھ کر

بچپن کی یاد آئی مچلنا پڑا مجھے

بجھتا جو میں تو مٹتا نشاں خاندان کا

میں آخری چراغ تھا جلنا پڑا مجھے

پانا کٹھن ہے زیور کردار دوستو

چاندی کی طرح آگ میں گلنا پڑا مجھے

یوںہی کہاں ملے ہیں یہ دوچار پھول بھی

عالمؔ ہزار کانٹوں پہ چلنا پڑا مجھے

khuddariyon ki had se nikalna para mujhe

mahaul ki chitaon mein jalna para mujhe

wo maslahat thi kya thi mujhe kuchh nahin pata

apna har ik usul badalna para mujhe

socha tha main rahunga hamesha uruj par

suraj ki tarah sham ko dhalna para mujhe

man ke hasin chand se chehre ko dekh kar

bachpan ki yad ai machalna para mujhe

bujhta jo main to mitta nishan khandan ka

main akhiri charagh tha jalna para mujhe

pana kathin hai zewar-e-kirdar dosto

chandi ki tarah ag mein galna para mujhe

yunhi kahan mile hain ye dochar phul bhi

alam hazar kanton pe chalna para mujhe